Intathelizindaba lenhlanganiso eziphathelane lokwethulwa kwezindaba elizweni zethuswe kakhulu linyathelo elithethwe yi Zimbabwe Media Commission, ZMC lokunika uMnumzana Tafataona Mahoso isikhundla sokuba ngumqondisi wayo.
I ZMC yiyo ebona ngokubhaliswa kwentathelizindaba kanye lokupha amalicence kulabo abafuna ukusungula amaphephandaba. UMahoso udume kakhulu ngokuvala amaphephandaba afana le Daily news le Daily news on sunday.
I Zimbabwe Media Commision izivikela ngokuthi ibone kuqakathekile ukuthi isebenzise uMahoso ngoba elolwazi olujulileyo kwezokubhaliswa kwamaphephandaba kanye lentathelizindaba.
Inhloko kahulumende uMnumzana Morgan Tsvangirai uthi i Zimbabwe Media Commission isiphuzile ukunika amalicence kulabo abafuna ukusungula amaphephandaba, esithi uzakhulumisana leziphathamandla zekhomishini le ukuze azwisise ukuthi kuyini sibili okwenzakalayo.
UMahoso ngumgcinisohlalo njalo weBroadcasting Authority of Zimbabwe ebona ngokunika amalicence kulabo abafuna ukusungula imisakazo.
UBrenda Moyo weStudio 7 ukhulume loMnumzana Njabulo Ncube umsekeli kamgcinisihlalo wenhlanganiso yeMedia Institute of Southern Africa- MISA Zimbabwe othi laloba uMahoso esephiwe isikhundla ku ZMC ithemba likhona elokuthi abantu sebezaphiwa amalicence okusungula amaphephandaba azimeleyo.